LEGAZPI CITY – Inihayag ng Philippine Institute of Volcanology and Seismology (PHIVOLCS) na wala namang improvement sa Bulkang Mayon pagdating sa mga aktibidad nito subalit hindi naman lumalala ang kondisyon nito.
Ito ang kinumpirma ni PHIVOLCS Resident Volcanologist Dr. Paul Alanis sa Brigada News FM Legazpi.
Ayon kay Alanis, sa ngayon ay maaaring masabi na may mga parametrong tumaas ngunit mayroon namang bahagyang bumaba.
Kasalukuyan pa rin naman umanong nakataas ang alert level 3 ng bulkan at hindi pa nila masasabi kung itataas ang status nito ngunit malinaw naman na hindi pa ito maaaring ibaba dahil mayroon pa ring lava flow, rock falls at uson.
Samantala, dagdag pa ni Alanis, maliliit lamang ang naitalang mga volcanic tremors sa bulkan bagama’t kanilang binabantayan hanggang ngayon kung lumalakas o patuloy na dumadami.
Ang tremors umano ay isang indikasyon na mayroong gas bubbles na umaakyat mula sa ilalim ng bulkan at namumuo.
Ayon sa kanya maaari itong mag-indicate na nagsisimula na itong mag-ipon ng pressure at posibleng magkaroon ng pagputok.
