SORSOGON CITY – Maaari umanong makaboto ang mga botanteng may sintomas ng Covid-19 o may temperature na 37.5 celsius o mas mataas pa.
Ayon sa Comelec, maglalagay ng Isolation Polling Places (IPP) sa mga lugar ng botohan para makaboto pa rin ang mga botanteng makikitaan ng sintomas ng nasabing sakit at nang mahiwalay sila sa kalakhang bulto ng mga botante.
Paalala pa ng Comelec, lahat ng botante ay dapat magsuot ng face mask at palagiang sundin ang health protocols at physical distancing sa loob at labas ng presinto sa araw ng halalan para sa kaligtasan ng lahat.
Una nang iniatas ni Interior Secretary Eduardo Año sa mga LGUs na dapat ay may nakalatag na hakbang para nakapagboto pa rin ang mga botanteng magpapamalas ng sintomas sa mga polling precincts.
Bunsod nito, pina-aktiba ng Kalihim ang mga Barangay Health Emergency Response Team (BHERT) para agad na makapagresponde sa oras ng medical emergencies.
