BICOL – UMABOT lamang sa lima ang bilang ng mga bagong kaso ng covid-19 na naitala sa rehiyon sa kasagsagan ng paggunita ng Semana Santa.
Base sa ipinalabas na weekly bulletin ng Department of Health o DOH-Bicol mula April 10 – 16, 2022, nagkapagtala ng 3 bagong kaso ang lungsod ng Naga habang mayroon 2 ang islang probinsya ng Catanduanes.
Katumbas ito ng .71% o less than 1 na average case para sa nasabing linggo at wala rin umanong severe o critical case sa mga bagong kasong naitala.
Bunsod nito, pumapalo na sa 59,048 ang cumulative cases ng covid-19 sa Bicol.
Samantala, nakapagrehistro rin ng 4 na bagong nakarekober na pawang nagmula sa Camarines Sur daan para umakyat sa 56,044 ang total recoveries habang wala namang naitala na bagong pagkasawi sa sakit kung kaya’t nakapako ngayon sa 2419 (4.10%) ang total covid-19 fatalities sa rehiyon.
