MOPASAKA gayud og kaso nga serious physical injuries ang pamilya sa menor de edad nga babaye nga gibunalan og rattan sa miyembro sa PHMI ug naigo sa usa ka mata niini ug dili na makakita.
Asoy sa apohan sa maong batan-on nga gipa-medical check up na ang mata sa bata ug nasuta nga may problema gayud ug dugang paghiling ang kinahanglan tungod maglisod nga makakita ang nabunalan nga mata.
Una na usab gibutyag ni Kapitan Ryan Dupalco sa Barangay Calumpang nga giimbestigahan na ang insidente ug nakumpirma nga usa ka miyembro sa PHMI ang namunal.
Segun pa sa batan-on nga layo pa daw ang tulo ka motorsiklo dihang gi-flagdown gamit ang rattan, apan naratol matud pa ang driver sa habal habal nga gisakyan niini ug mipaburhot ug siya nabunalan.
Giila usab sa pamilya sa batan-on ang maong PHMI member kang Kevin Luag asa kauban ang igsuon usab niini nga miyembro gihapon sa maong grupo.
