GINOO na lang ang gisandigan sa pamilya Pacaldo aron masumpayan pa ang kinabuhi ni Noraliza Pacaldo, 57-anyos nga taga Greenville, Brgy.Calumpang nga nag-antus sa gastric cancer.
Saysay ni Rubeen Pacaldo, 56-anyos, mananagat ug bana ni Noraliza nga daw kumuton ang kasing kasing niini tungod sa sakit nga giantus sa asawa.
Asoy niini, nga bisan ang ilang ipalit og pagkaon ang magamit pa sa tambala apan kulang gihapon kini.
Sa diagnose sa doctor, kinahanglan nga operahan si Noraliza aron matangtang ang bukol sa tungol niini, apan sa kalisod sa ilang kinabuhi wala kini mahitabo.
Bisan ang pagpa-chemotherapy ang maglisod usab sila tungod dako ang gastos.
Sa karon, bugtong gihangad nila sa Ginoo ang tanan ug mihangyo sa mga miyembro sa KaBrigadahan GenSan nga bisan sa tambal matabangan sila.
Nasayran nga may tulo ka anak ang magtiayon, apan pamilyado na usab.
Sa karon maglisod na sa paglakaw si Noraliza ug kinahanglan nang alalayan tungod miniwang na usab kini ug nag-antus sa kasakit sa tiyan, ug ginapaagi na lang sa tubo nga gitaod sa tiyan ang gi-blender nga pagkaon.
Nakatigom ang KaBrigadahan og P4,400 sa usa ka adlaw nga panawagan ug gitunol ni Atty Kan Balleque sa Ronda Brigada program ang maong kantidad sa anak ni Noraliza nga si Ronald Pacaldo. Nagpasalamat kini sa maong kantidad nga gitampo tampo sa mga miyembro ug dakong tabang na kini alang sa iyang inahan.
