Plano sang pamunuan sang Barangay Baybay, Roxas City nga magpasa sang isa ka resolusyon sa Department of Public Work and Highways nga temporaryo anay nga ipasarado ang dalan sa may bahin sang airport bangud ginahimo nga tambayan, ilimnan kag may nagakarera pa sang motorsiklo nga ginareklamo naman sang mga residente.
Sa interview sang Brigada News FM Roxas kay Kapitan Erwin Oroceo, iya ginpahayag nga ini ang ila nakita nga pamaagi agud mauntat na ang pagtuga sang disturbo sang pila ka mga indibidwal sa ila lugar.
Suno kay Oroceo, madamo nga pumuluyo ang nagatinawag sa iya sa dis-oras sang gab-i bangud indi matulogan sa gahod nga ila nababatian gani iya man ini nga ginapadulungan kag sawayon.
Dugang pa sini nga may ginbutang naman sila nga karatula sa lugar apang wala man ginasunod.
Nagapangayo man ini sang pasensya sa mga residente nga maapektuhan sang closure kag nagpanugyan nga didto magaagi sa Sitio Sto. Niño sa daan nga alagyan. | Judy Ann Juare
