Milawig ang pinaka-dako og pinaka-modernong Balangay paingon sa West Philippine Sea partikular sa Pag-asa island aron ipamugos ang katungod sa nasud sa territorial waters nga gipalibutan sa mga barko sa China. Nakatakda’ng magpahigayon usab og medical mission ang grupo sa isla sa pagpanguna ni Dr. Ted Esguerra.
Martes pasado alas-6:30 sa gabii, nakaabot sa Pagasa Island ang nahisgutang balangay nga migikan sa Butuan City port niadtong Lunes, Mayo 27 sakay ang 19 ka mga crew.
Mi-abot usab og halos 37-oras ang paglawig sa grupo gikan sa Fort Balangay sa San Vicente, Palawan kondiin gisabayan pa sila sa Chinese Coast Guard Ship 5204 sa distansyang halos 2-milyas uban sa unom ka mga gagmay’ng bangka.
Gika-ingong duha ka oras human sila mibiya sa San Vicente, mitingog ang ilang radyo kondiin tingog sa usa ka lalaki nga gitu-uhang Intsik nga nagbalik-balik pagtawag kanila.
Una nang nakasinati sa mga hagit ang grupo ayha nakabiya ang Balangay sa Butuan kundiin naabtan og unom ka oras ang mga crew paglunsad sa Balangay sa Agusan River, pipila ka oras ayha ang scheduled departure niadtong Mayo 25.
Ang modernong balangay nga gipanganlan og Florentino Das adunay couches og air conditioning sa cabin. Aduna usab kini wi-fi og adunay makina.