Gintaban sang wala matumod nga mga suspetsado ang bag sang isa ka senior citizen matapos gin-snatch samtang nagalakat ini sa karsada sa Alcazar Subd., Brgy. XI, Roxas City.
Ginkilala ang biktima kay Ethelda Diaz, 62-anyos, accounting clerk sa isa ka medical supply kag residente man sang nasambit nga barangay.
Sandig sa ginpabalhag sang biktima sa Roxas Component City Police Station, takna alas 7:00 sang gab-i, Lunes, Pebrero 12, nakisakay ang biktima sa motorsiklo sang iya katrabaho gikan sa ila gina-ubrahan, pag-abot sa nasambit nga lugar, nagpundo ang driver agud kay-uhon ang iya motorsiklo matapos nagbisyo.
Bangud malapit nalang ang balay sang biktima, nagdesisyon ini nga maglakat-lakat nalang pauli, apang hinali nalang nag-abot nga duha ka lalaki nga nagasakay sa motorsiklo kag madasig nga ginsabnit ang iya shoulder bag nga nagaduag brown kun sa diin naga-unod sang P3,000, ATM cards kag nagkalain-lain nga mga Id’s.
Madasig naman nga nagpalagyo sa wala matumod nga direksyon ang mga suspetsado matapos ang nahimo nga krimen.
Sa karon, padayon naman ang imbestigasyon sang kapulisan sa nasambit nga insidente. | Judy Ann Juare
