Wala nagpangduha-duha ang isa ka amay nga i-papriso ang iya anak matapos nag-maoy kag nagtuga sang gamo sa ila puluy-an sa Sitio Proper, Brgy. Lanot, Roxas City.
Ginkilala ang amay kay alyas Paquito, 71-anyos samtang ang anak nga nag-maoy amo si alyas Raymer, 39-anyos, lunsay mga residente sang nasambit nga lugar.
Sandig sa impormasyon nga nakuha sang Brigada News FM sa Roxas City PNP, gindala ni alyas Paquito kag sang isa ka Barangay Kagawad si alyas Raymer sa ila istayon agud ipa-priso.
Nahibaluan nga yara sa impluwensya sang makahulubog nga ilimnon ang suspek sang ini ang nagmaoy.
Sa karon, nagapabilin ini sa Roxas City PNP para sa nagakaigo nga disposisyon. | Judy Ann Juare
