Tanggong na sa prisohan sa Philippine Drug Enforcement Agency (PDEA) Caraga ang isa ka empleyado sa goberno human nakuhaan sa suspected shabu diha sa PS Arcade, JP Rosales Avenue, Brgy. Imadejas, Butuan City pasado alas – 10:00 kaganihang buntag.
Sa interbyu sa Brigada News FM Butuan, giila ni Dindo Abellanosa, ang tigpamaba sa PDEA Caraga ang dinakpan nga isa ka Loida Verallo, hingkod ang edad.
Sumala ni Abellanosa, nasimhotan sa dalang K9 dog sa operatiba ang dala sa dinakpan nga suspected shabu hinungdan nga daling gi-rekisa ug didto nabesto.
Nabawi gikan sa posisyon sa dinakpan ang 4 ka sachets sa gituohang shabu nga nagtimbang og 100 grams nga dunay market value nga P680,000 ug uban pang mga gamit.
Padayon pang gisuta sa otoridad kun unsay tinuod nga trabaho sa dinakpan human nakuhaan kini’g identification card sa isa ka ahensya sa goberno.
Kasong paglapas sa Section 11, Article II sa Republic Act No. 9165 kun Comprehensive. Dangerous Drugs Act of 2002 ang atubangon sa dinakpan.
