Patay ang usa ka babae human kini naligsan og trailer truck, pasado alas 4:00 kagahapon sa hapon, Mayo 21, 2024 sa Brgy Tibunco ning syudad.
Giila ang biktima nga si Tessie Broa Encio, 53 anyos, vendor nga residente sa Sasa, Davao City.
Samtang ang driver sa truck giila nga si Reynold Algopera, 32 anyos, minyo nga residente sa Prk.6-A Buhisan, Brgy. Tibungco Davao City.
Sa inisyal nga imbestigasyon sa kapulisan, ayha ang panghitabo gisubay sa trailer truck ang Daang Maharlika National Highway gikan sa South ug padulong sa North.
Apan pag-abot sa lugar nga nahitaboan, nihunong matod pa ang ang truck duol sa pedestrian lane gumikan daghan ang mga pedestrian nga mitabok sa highway.
Dihang mi-abante na ang truck, wala matod pa mabantaye sa drayber ang giingong babaye nga pedestrian hinungdan nga naligsan kini.
Dali usab nga miresponde ang TRABMOC responder sa lugar ug gilayong gidala sa SPMC ang biktima human nakaangkon kini og serious body injury apan gideklara sa doktor nga nakabsan na sa iyang kinabuhi.
Balhog na karon sa prisohan ang drayber sa truck ug mag-atubang sa kasong Reckless Imprudence Resulting to Homicide.
