GIBASOL karon sa Chairman sa Gensan Drivers and Operators Group ngadto sa programang Libreng Sakay.
Ang kawad-on sa pasahero mao nga nagsinukmagay na ang mga driver gawas sa usa ka Mall.
Sa paghinabi sa 89.5 Brigada NewsFM Gensan sa kanhi Tricycle Federation President Ug kasamtangan nga Chairman sa Gensan DOG nga si Rex Carenio alang kaniya nihinay ang pamasada sa mga tricycle drivers tungod sa Libreng Sakay, ang resulta naga-ilugay na og pasahero sa gawas sa Mall.
Ang iyang sugyot nga dapat walaon na ang Libreng Sakay aron patas sa pasahero ang e-jeep ug mga tricycle, dapat daw hatagan kini og pagtagad sa bag-ong mopungko nga mayor sa Gensan ug sa komitiba sa transportasyon sa konseho.
Ang laing sugyot niini sa mall nga unta dili na tugtan ang pagtorno sa agianan mismo kondili mo panaug ug mopasakay lang og pasahero ang mga sakyanan, pasunod lang ang mo pick-up samtang ang uban sa layo maghulat aron wala untay inilugay sa pasahero.
Samtang sa bahin sa manager sa Metro Gensan nga naka-avail usab sa Libreng Sakay sumala ni Orly Sabelita nga sa Hunyo 15 mahuman na sila sa Libreng Sakay,nakatabang daw kini og daku kanila sa panahon sa pandemya nga dunay dakung loan sa bangko sa pagkuha sa ilang mga unit sa e-jeep.
Tinuod daw nga nidaghan ang pasahero sa Libreng Sakay kay gikan sa normal sa una nga 1,200 ka pasahero sa usa ka adlaw, nahimo nga 5,450 ka pasahero ang ilang ma serbisyuhan matag adlaw.
Apan dili daw mabasol sa Libreng Sakay ang kaguliyang sa mga driver sa tricycle kay sa wala pa ang e-jeep pipila na ka mayor ang wala nakasulbad sa problema sa tricycle, sugyot ni Sabelita nga dapat may political will ang mayor, mohatag ba og franchise sa walay franchise o magpabilin nga daghan ang colorum o kaha ipatuman ba ang zoning? Anaa sumala pa sa mopungko nga mayor ang solusyon. I Ver Diazon
