IGO nalang sa pagbakho ang asawa sa biktima sa ulahing pagpamusil sa General Santos City pasado alas 5 sa buntag sa National Highway, Brgy. Labangal.
Ang biktima giila sa pangalang Esmael Guiamel, hingkod ang pangidaron ug nagpuyo sa Purok Malipayon, Brgy. Labangal, kanhi nagamaneho og trisikad unya karon nagatinda na og pagkaun ug pastil sa ilawom sa balite nga kahoy sa Crossing Makar.
Sumala sa asawa nga si Mary Jane bag-o lang sila nakaabot sa ilang pwesto kay mangabli sa ilang tinda sa dihang may mga tulo ka buto kini nga nadunggan, nakatalikod daw siya ug ang ilang batang lalaki ang nakakita sa namusil, mahagba usab dayon ang biktima nga may samad ug nagkadugo.
Sumala sa batang lalaki naka-mask unya nakasakay sa motorsiklo nga itum ang namusil ug wala siya nakaila niini, tulo usab ka buto ang iyang nadungog.
Ang kabanay sa biktima niadto sa crimescene ug namahayag nga ilaha dayon ipalubong si Guiamel sa Cotabato kay taga didto gayod sila.
Samtang ang usa sa mga silingan nga si Fairodz Talilisen nakuratan nalang daw sila kay sa paghawa sa biktima nanawag pa kini kanila nga magkuyog sila apan wala sila nakasabay kay namahaw pa sila niinang higayuna,nakita nalang nila nga gitapuk-an na sa mga tawo ang pwesto sa magtiayon. Sa iyang pagkasayod kaniadto lang bulan sa Abril 2022 nagsugod ang pastilan sa magtiayon unya sa dihang naga byahe pa kini ug sikad may nakalaban kini nga striker kay nangilog daw ug pasahero mao nga nag abot sila sa pulis. I Ver Diazon
