Igo nalang sa pagdungoyngoy ang apuhan nga Julie Udtohan sa brutal nga kamatayon sa iyang 16 anyos nga apo kauban ang usa pa ka 14 anyos sa Brgy Camudmud, Babak District, Island Garden City of Samal, pasado alas 10:00 sa gabie sa milabay’ng Dominggo.
Sa pagpanubay sa Brigada Investigative Series team, nasayran gikan sa nakasaksi nga gisulod sa usa ka wala pa mailhing suspek ang mga biktima sulod sa computer shop ug kalit lang nga gipusil ang 14 anyos nga si alyas Filjack dayon gisunod 16 anyos nga si alyas Dansoy.
Nakadagan pa sa gawas ang duruha ka menor de edad apan wala makuntento ang duruha ka suspek ug giayo-ayo og pusil sa makadaghang higayon ang duruha hinungdan sa ilang hinanaling kamatayon.
Gihulagway sa saksi sa Brigada ang duha ka suspek nga dagko ang mga lawas, nakasuot og puti mga mask, nakasuot og jacket nga blue ug naka kalo.
Samtang ang usa ka suspek nga nag-atang sa gawas nakasuot og itom nga jacket, itom nga kalo, nakapantalon ug naka sapatos.
Sa karon blanko pa ang kabanay sa mga biktima kung si kinsa ang mihimo sa krimen sanglit kahibaloan walay nakaaway ug nadawat nga hulga ang mga biktima.
