Nagapabilin ang Blue Alert Status kang Emergency Operations Center sa probinsya kang Antique.
Sandig sa PDRRMC Memorandum nga ginpirmahan ni Governor Rhodora Cadiao, ‘maintained’ ang Blue Alert Level sa probinsya bangud kang Habagat nga ginpabaskog kang Bagyong Enteng.
Kadungan ka dya, hugot nga ginapangabay ang mga LGU sa Antique nga magsunod sa pareho nga alert status kag sundon ang Bravo Protocol sa Emergency Preparedness and Response (EPR).
Samtang, gindeklara man nga suspendido ang klase halin preschool asta senior high school sa parehas nga pampubliko kag pribado nga mga eskwelahan sa mga banwa kang Sibalom, Belison, Caluya, Libertad, Tobias Fornier, Culasi, Barbaza, Anini-y, Valderrama, San Jose, Hamtic, kag Laua-an.
Kanselado man sa tanan nga lebel ang klase sa pampubliko kag pribado nga eskwelahan sa Tibiao, San Remigio, Sebaste, kag Pandan.
Ginsuspinde man kang University of Antique Libertad Campus kag Antique Vocational School sa Bugasong ang andang Face-to-Face Classes.
Samtang ang banwa kang Patnongon ang nagkansela kang andang mga klase sa tanan nga lebel sa pampubliko kag pribado nga eskwelahan kadya nga hapon.
