Ipinag-utos ni Interior Sec. Eduardo Año ang imbestigasyon sa nangyaring sunog sa Zamboanga del Sur provincial health office kung saan aabot sa halos 150,000 doses ng COVID-19 vaccines ang nasira.
Ayon kay Año kasama ang Department of Health, Philippine National Police at Bureau of Fire Protection sisiyasatin nila kung nagkaroon ba ng pagkukulang na nagresulta sa pagkasayang ng mga bakuna.
Dagdag pa ng kalihim dapat maging ‘wake up call’ ang naturang pangyayari sa iba pang local chief executives na mas higpitan ang pagbabantay sa mga bakuna.
Mas mainam ayon kay Año na agad maiturok ang mga bakuna sa mga tao nang sa ganun ay maiwasan ang pagkasayang ng mga ito.
Handa naman umano ang DILG na parusahan ang mga LGUs na mapapatunayang nagkaroon ng pagkukulang.
