GISAULOG og sayo sa grupong Knights of Columbus sa General Santos City ang ika-160 nga adlawng natawhan ni Andres Bonifacio, usa ka bayani sa Pilipinas.
Sumala kang Master of the Fourth Degree District 25 South Eastern Mindanao Rudy Catapang Jr. nga matag tuig na nga ginasaulog sa ilang grupo ang Bonifacio Day sa rason nga si Bonifacio ang usa sa napili sa ilang grupo nga mapasidunggan sa rason nga mao kini ang nagpasiugda sa Katipunan nga nahimong mitsa sa rebolusyon sa panahon sa pagsakop sa mga Espanyol sa Pilipinas kaniadtong 1896.
Nitambong usab sa okasyon ang mga opisyales sa General Santos City Police Office sa pagpanguna ni PLt. Col Nicomedes Olaivar Jr. ug naghatag og mensahe nga ehemplo si Bonifacio sa pagpakita ug pagmahal sa nasud gumikan dinhi gibuhis niini ang iyang kinabuhi.
Nabalik na usab ang sundang sa estatwa ni Bonifacio sa Plaza Heneral Santos human nga natangtang tungod nahugmakan sa dakung kahoy. I Ver Diazon
