NADAKPAN sa San Isidro PNP ang suspek sa pagpatay sa usa ka tig-alima ug manok panabong Nobyembre 26 sa gabii.
Sumala sa tigpamaba sa General Santos City Police Office nga si PLt Col. Rexur Canoy nga human sa hitabo wala nihunong ang kapulisan sa pag imbestiga ug sa tabang sa Intelligence Community natultolan ang nahimutangan sa suspetsado ug nabawi ang cellphone sa biktima.
Giilla ang suspek nga si Rolando Alud, 23-anyos, ulitawo ug nagatrabaho sa usa ka ranso sa Gensan kung asa giangkon niini ang salaud nga nahimo.
Segun niya nga naglagot kini sa biktima gumikan nanghipo sa usa ka babaye hinungdan nga iyang gihapak ug kahoy nga pangkalso sa sakyanan paggawas sa imnanan.
Ang biktima mao si Lloyd Bacea, 31-anyos nga taga Purok Malipayon, Barangay San Isidro, nagatrabaho isip tigalima og manok panabong.
Naghilak sa grabing kasubo ang amahan ni Lloyd nga si Jose ug pursigido nga ipasaka ang kaso batok sa suspetsado. I Ver Diazon