LEGAZPI CITY – Dawa pa igwa na nin decampment advisory an Albay Provincial Disaster Risk Reduction and Management Council (PDRRMC) sa mga bakwit kan Bulkang Mayon na hale sa 6 kilometers permanent danger zone, dai pa ibababa an alert level status kaini.
Ini an sinabi ni Philippine Institute of Volcanology and Seismology (PHIVOLCS) Resident Volcanologist Dr. Paul Alanis sa Brigada News FM Legazpi.
Sa intrevista saiya, sinabi niya na presente pang nasa alert level 3 status an bulkan asin dai pa ninda ini babaguhon.
Kun marurumduman kaya, mga parametro an bulkan na nagbabaraba, alagad, padagos pa man giraray na nakakapagrehistro ki mga pyroclastic density currents o uson kaya ini an saindang pigtututukan asin pinagbabantayan.
Segun kay Alanis, apwera kaini, sa ngunyan, padagos pang nagluluwas nin lava an bulkan na saro man sa pinakadelikado para sa buhay kan mga residenteng nakaistar harani sa pamitisan kaini.
Mientrastanto, pigsyerto niya na padagos an PHIVOLCS sa pag-monitor sa sitwasyon kan bulkan asin laoman su boot an regular na mga update asin rekomendasyon.