LEGAZPI CITY – Tuminaram na an Provincial Veterinary Office kan Albay dapit sa kahapotan kun nata warang mga hayop o livestock na pig-ebakwar sa syudad kan Tabaco na hale sa anom na kilometrong permanent danger zone kan Bulkan Mayon.
Sa intrevista kan Brigada News FM kay Provincial Veterinarian Dr. Pancho Mella, pigklaro kaini na dai ninda pigpabayaan an mga atamang hayop kan mga paraoma sa nasambitan na lugar, kundi katunayan igwa su boot sindang pigpirmahang waiver na nagpapatotoo na kahagadan kan mga paraoma na dai ipag-ebakwar an mga ataman.
Segun kay Mella, kasabay sa contingency plan kan probinsya katakod kan bulkan an pagpapa-ebakwar sa mga paraoma asin sa mga ataman kaini kun kaya tulos man sindang nakikipagkoordinar sa mga LGU.
Alagad kan nakipag-olay na sinda sa City Vet kan Tabaco, mismong an mga paraoma na su boot an dai nagtugot.
Segun su boot sa mga paraoma, maski man sa mga enot na pag-alburoto kan bulkan sa mga nakalihis na taon, dai man sinda pig-aabot kan uson.
Pigsabi ni Mella, dai na ninda pinirit an mga paraoma na iebakwar an mga ataman, alagad aware man su boot sinda na dai sinda pwedeng magbaralik-balik sa mga lugar nganing magbahog durante kan peligro kaini.
Mientrastanto, uminabot na sa dyis-mil na mga ruminants o mga hayop siring kan karabaw, baka asin kanding an presenteng nasa pulling sites huli sa pag-alburoto kan bulkan segun kay Mella.
