LEGAZPI CITY – Nangako nin marikas na aksyon an Albay Veterinary Office katakod kan duwang bagong nairehistrong kaso nin African Swine Fever sa siyudad kan Ligao sa probinsya. Segun kay Provincial Veterinarian Dr. Pancho Mella, nakaresibi nin report an saindang opisina hale sa City Veterinary Office kan Ligao na igwa na naman nin duwang panibagong kaso kan nasmabit na helang sa mga orig sa Barangay Tastas asin za Barangay Ranao-Ranao kan nasambit na siyudad.
Alagad, tinawan doon ni Mella na wara pa man nin outbreak kan helang apwera sa duwang nagpositibo sa siyudad nin Ligao.
Para man mabawasan an paghandal kan mga residenteng hog raiers, sinabi kan opisyal na an saro o duwang kaso, dai man nangangipo na magkondusir nin mass culling.
Kun magigirumduman, kan nakalihis sanang duwang semana, ipighayag kan AVO na ASF-free na an bilog na probinsya kan Albay makalihis na ideklarar na nasa pink zone status na an banwaan kan Tiwi sa nasambit na helang.
Mientrastanto, positibo an saindang opisina na sa oras na maging matrayumpo an presenteng pigsasagibong mass testing kan mga bagong bakuna para sa mga orig, posible subuot na mahali na kaini an mga paghadit kan kada swine farmer.
