Mabahoe ro pagpasaeamat it sangka Aklanon OFW nga naka eksperiensya it kalisud sa nasyung Iraq, bangud nakauli eon raya sa Aklan.
Sa interview it BRIGADA NEWS FM KALIBO kay Gemma Cadahig Lentija, taga Brgy. Mayapay, Buruanga, Aklan, ag sangka OFW sa Iraq, naagyan nana igto ro masobra 8 oras nga pagtrabaho, bukon it monthly ro pagtao kana it sweldu, owa imaw it day off, kueang ro pagkaun, owa ginapasugtan nga makaguwa ag nabawaean nga gumamit it cellphone.
Aminado man si Lentija nga illegal ro nag-recruit kana nga agency para magtrabaho sa Iraq.
Maabu eon segun nga ahensya ro ginpaeapitan ku anang ina nga si Nanay Herminia Cadahig pero owa segun sanda nabuligan ngani nagpangayo sanda it bulig sa anang Barangay Kapitan nga si Irene Prado.
Nagpangayo man segun it bulig si Kapitan Prado kay SB Member Allan Dagohoy ag kay Congressman Teodorico “Nonong” T. Haresco, Jr., ngani na-proseso eagi ro anang pag uli.
Nagpasaeamat si Nanay Herminia sa mga nagbulig nga salbar nga nakauli ro anang unga nga si Gemma, nga imaw man ro andang ginasaligan bangud raya segun ro nagabulig sa andang pamilya. // ANN DESLENE SALAZAR
