Sa low-risk category eun ro health care utilization rate sa probinsiya it Aklan bangud sa padayon nga pagnaba it mga numero it mga kaso it mga indibidwal nga ginatamaan it COVID-19 virus.
Ro health care utilization rate sa probinsiya hay 8.4%, raya ro pinakamanaba sa bieog nga rehiyon, raya hay base sa datos it Department of Health Center for Health Development.
Base pa sa pinakaulihi nga datos, ap-at nga pasyente eamang o 12.12% ro narekord nga nagangamit sa intensive care unit bed, samtang 17.14% it isolation bed ro okyupado.
Ro occupancy rate hay ginaturing nga mataas ro peligro kung raya hay masobra sa 70%, ag moderate man kung sa tunga it 60% hasta 69%.
Ro average daily attack rate sa kada 100,000 populasyon hay mas naganaba pa sa 0.43% ku mga nagtaliwan nga dominggo.
Matandaan nga sa probinsiya it Aklan, indi magnaba sa 358 katawo ro namatay sa tiempo it pandemya./JIL B. LACSON
