Andam moatubang sa City LGU ang Alliance of Filipinos For Freedom and Informed Choice (AFFFIC) sa higayon nga ipatawag sila aron patubagon sa sa mga pangutana kabahin sa tumong sa gimuntar nga billboard sa J.P. Laurel Avenue sa Bajada ning syudad.
Matud kang Alcherie Patino, AFFFIC Spokesperson, mas labing maayo kung ipatawag sila aron masayran kung unsa ang nahimong kalapasan sa gibutang nga billboard unod ang mensahe-pahimangno sa mga ginikanan pagpabakuna sa ilang mga anak.
Walay nakitang sayop ang AFFIC sa gihimo nilang lakang ug gibarugan nga dili sila supak sa vaccination rollout sa gobyerno apan gusto lamang nila nga mohatag og awareness sa mga ginikanan.
Gawas niini, niagi usab matud pa sa sakto ug legal nga proseso ang pagbutang sa billboard diin dunay gihuptan nga permit ang advertising agency nga gibayaran.
Kahibaluang gipatanggal dayon sa City LGU ang maong billboard diin gihingusgan nga supak kini sa kampanya sa lokal nga panggamhanan sa pagpamakuna nga makaapekto matud pa sa turn-out. BNFM-Davao
