Dismayado ang provincial local government sa Davao del Sur sa Department of Health human nga gitangtangan kini og lisensya aron makaoperate isip Level 2 hospital.
Sumala kang Davao del Sur Governor Marc Douglas Cagas, dako kining kawad-on sa katawhan nga magkinahanglan og operasyon lakip dinhi ang ceasarean operation human nga gidowngrade na lamang isip infirmary ang Davao del Sur Provincial hospital.
Tungod niini, nanawagan ang opisyal ngadto sa Department of Health XI nga tabangan mahibalik sa level two ang license to operate sa provincial hospital aron dili maapektuhan ang publiko.
Una niini, gikan sa level two status, gihimong infirmary ang Davao del Sur Provincial Hospital subay sa gipagawas sa DOH Central Office nga license to operate diin base sa dokumento nga gipagula sa Health Facilities and Services Regulatory Bureau, ang ospital dunay mga kakulangon.
Apan ang maong mga kakulangon gipaningkamotan nga mapalambo sa PLGU-Davao del Sur pinaagi sa alokasyon sa pondo nga gamiton alang sa pagpatukod og moderno nga emergency rooms, ug ubang serbisyo.
