Ginpanugyanan ni Police Brigadier General Sidney Villaflor, Acting Regional Director sang Police Regional Office VI si PCOL Jerome D Afuyog Jr., Provincial Director Capiz PPO nga pagatutukan ang mga iligal nga buluhaton sa probinsya kag ang mga kapulisan nga may mga kaso ukon naulamid sa pila ka mga iligal nga aktibidad.
Sa interview sang Brigada News FM Roxas City kay PCOL Afuyog, ginpahayag sini nga ginmanduan siya ni Police Brigadier General Sidney Villaflor nga kun may sala ang isa ka pulis sa iya nasakupan dapat ini nga mapanabat kag kun kinahanglan nga silotan, pagasilutan ini.
Suno pa kay Afuyog, indi nila pagpabay-an nga may mangguba sa mga kapulisan kag padayunon nila ang ila maayo nga trabaho.
Dugang pa sini, nga ila ginatutukan ang mga iligal nga buluhaton nga nagakatabo sa probinsya kasubong sang lapnagon nga iligal nga droga kag mga pasugal.
Mahibaluan nga isa sa focused agenda ni PNP Chief Police General Benjamin Acorda Jr. amo ang “Honest and Aggressive law enforcement operation” kun sa diin dapat matuod ang pag-implementar sang mga checkpoint kag pila ka mga operasyon nga ginapatigayon sang mga kapulisan.
Lakip sa mensahe nga ginpalab-ot ni Villaflor nga nagakadapat hatagan sang awards kag recognition ang mga kapulisan nga may maayo nga binuhatan.
Suno diri, nagataas ang lebel sang moral sang isa ka pulis kun ginarekognisar sang organisasyon ang maayo sini nga hinimuan, mas maganahan pa ini nga magtrabaho kag makahimo sang maayo nga aktibidad.
Dugang pa ni Villaflor, nga kinahanglan man sang mga kapulisan nga i-improve ang ila skills pag-abot sa teknolohiya, ilabi na subong nga panahon nga yara na ang kalibutan sa modern world kag naga-evolve na ang way of living kag kriminalidad. | Judy Ann Juare
