Gibutyag ni Cebu City Acting Mayor Raymond Alvin Garcia nga hugot niyang monitoron og maayo ang pag organisar sa umaabot nga Palarong Pambansa karung buwan sa Hulyo sa kasamtangang tuig.
Makigtagbo sab siya kang John Pages, kinsa maoy Chairman sa Cebu City Sports Commission ug sa mga miyembro sa Palaro organizing committee aron hisgutan ang ilang mga pagpangandam ug mohimo og mga kausaban.
Si Acting Mayor Garcia niingon nga gusto niya nga mag-una sa organisasyon sa Palaro aron masiguro nga kini nahimo sa husto ug hapsay.
Gibutyag sab ni John Pages nga nagmalampuson nilang napahigayon sa CVIRAA Meet 2024, bisan pa sa pipila ka gagmay nga mga hagit, siya niingon nga ang iyang nakat-onan ug sa kaubang organizers atol sa CVIRAA, mapauswag sa panahon sa Palarong Pambansa 2024.
Gipasalig sab ni Pages nga ang tanang available nga sports venues sa dakbayan, sama sa Cebu City Sports Center oval, andam nang gamiton usa ka buwan sa dili pa ang Palarong Pambansa 2024.///