Ginkumpirma it Philippine National Police Western Visayas nga ro reckless driving ag driver’s error ro nagapanguna nga mga rason it vehicular accidents sa rehiyon.
Ro naangkon nga datos hay igasumite it Police Regional Office 6 (PRO-6) sa Regional Law Enforcement Agency Coordinating Committee para mataw-an it naka-igo nga aksyon.
Base kay Police Colonel Gilbert Gorero, hepe it Regional Operations Management Division it PRO-6, nakarekord it 1,531 kaso it reckless driving ag 1,474 kaso it driver’s error sa una nga limang buean it dag-on ngara.
Nagtaas man ro numero it mga mechanical reasons and road rage accidents makarang dag-on.
Samtang nagnaba man ro reckless imprudence resulting in homicide sa rehiyon./JIL B. LACSON
