Ginpahanumduman it Department of Trade and Industry (DTI) Region 6 ro publiko sa pagbakae it mga Christmas decorations, partikular eun ro mga Christmas lights.
Base kay Felisa Judith L. Degala, Iloilo DTI director, ro pagabakeon nga produkto hay dapat may Philippine Standard (PS) mark o Import Commodity Clearance (ICC) sticker.
Raya ro magaserbe nga sueondanan ag assurance sa mga manugbakae sa mga produktong ginabakae hay may sertipikado nga kalidad ag nagasunod sa Philippine National Standards (PNS).
Ro uwa it mga marka o sticker hay pwede magtuga it peligro sa mga manugbakae, dugang pa nana.
Samtang, nagpaandam man si Degala sa mga retailer nga madakpan nga nagabaligya it mga Christmas lights nga uwa it PS mark o ICC stickers, magapangatubang sanda sa pag-eapas sa Product Standard Law ag Deceptive Sales Act./JIL B. LACSON
