DISMAYADO si GenSan City Mayor Ronnel Rivera sa ‘murag’ pagdelatar ni Kagawad Franklin Gacal Jr., sa pagpasar sa gipangayo nga budget.
Matud sa mayor, dugay na niyang gipangayo ang P232 milyon nga alang sa COVID-19 response nga unod sa Supplemental Budget no. 3 tungod dili niini buot madelatar ang pagresponde sa panginahanglan kalabut sa COVID-19.
Sa wala pa nahisgotan ang SB no.3 sa konseho, nagpatabang na kini kang Bise Mayor Loreto ‘Tonton’ Acharon alang sa budget. Gumikan nasayod matud pa ang bise mayor sa panginahanglan sa budget tungod anaa kini sa matag pulong sa Local- IATF.
Matud ni Rivera nga dismayado siya kang Gacal isip chair kaniadto sa Committee on Finance tungod mahimo man daw siya niining duolan kung aduna kini mga pangutana, tungod kinahanglan nga mapadalian ang paghatag sa panginahanglanon sa katawhan karong pandemya.
Una nang, gihingusgan ni Gacal nga gawas sa kalit nga pagtanggal kaniya isip chairperson sa finance committee, gipasar ang resolusyon nga walay igong dokumento nga gipakita ug wala nasayod asa pa-ingon ang maong salapi. Sa bahin ni Gacal, andam sumala pa siya nga ipresenta ang tanang nasayran kalabut sa isyu sa plenaryo. ( Richel Gubalani)
