NAPUTOL ang kahinam ug kalipay sa mga boxing fans human gi-anunsyo ang resulta sa away ni Senador Manny Pacquiao nga unanimous decision pabor sa Cuban Boxer nga si Yordenis Ugas nga nagahupot sa WBA welterweight belt.
Ang reaksyon ni Cesar Vargas nga ihado sa kasal ni Pacquiao, medyo dismayado ug naluya siya kay nagadahom siya nga modaug ang iyang ninong apan napildi pinaagi sa puntos.
Nagtan-aw daw siya sa telebisyon apan wala pa nahuman ang iyang pagtan-aw aduna nay daghang text messages nga nagapahibalo nga napildi si Pacman mao nga naluya siya.
Gidugang ni Vargas nga ingon ana man gayod ang paugnat sa kusog adunay modaug ug mapildi apan nagapanghinaut siya nga dili ma- apektuhan ang political career ni Pacman.
Samtang gitawag nga talawan ni Purok Kagawad Boyet Bagatao ang kaatbang ni Pacman nga si Ugas ug ang gusto niini nga mag-rematch ang duha kay nakita daw niini nga kaya pa ug may kusog pa ang Pambansang Kamao.
Nahimo usab nga malinawon ang kadalanan sa Gensan gumikan naatol sa Sunday lockdown ang away samtang pipila ka priso gikan sa usa ka police station ang nitan-aw sa away pinaagi sa Facebook live, samtang wala usab ang naandan nga pay per View sa Lagao gymnasium. ( Ever Diazon)
