GIANGKON sa mayor sa GenSan nga nadaut ang sinakong bugas nga naka-stock sulod sa Lagao gym sa Barangay Lagao.
Matud ni Mayor Ronnel Rivera, naa lang sa napulo (10) ka sako sa bugas ang nadaut tungod naigo sa salibo sa ulan. Gihingusgan niini nga ‘normal’ lang nga dunay maigo sa salibo sa ulan sa libo-libong bugas nga na-stock sa gym.
“Very minimal actually in fact ang reported sa akoa 10 sacks ang naigo sa salibo katong kusog ang ulan sa libo-libo nato nga stock didto that’s normal naa gyud siya’y naigo gamay, but rest assured nga proteksyonan nato ang assets sa Local Government and intended to support sa mga constituent natong naglisod so walay angay kabalak-an kay under control nato ang situation, angkonon nako na naa gyud tinuod,” asoy ni sa mayor.
Ang wala na-distribute nga bugas ang giandam alang sa posibleng pag-worse sa quarantine measures batok COVID-19, asoy ni Rivera. Lakip ang posibleng pag-igo sa ubang kalamidad sama sa pagbaha o sunog asa daghang residente ang mahimong mahatagan.
Una nang, gibutyag ni Jose Kevin Sienes, usa sa executive assistant sa city hall nga pipila ka sako sa bugas ang nadaut na ug dili na mahimong makaon. Ang na-stock nga bugas ang kabahin sa 7,200 metric tons nga gipalit sa city government atong Abril 2020 nga nagkantidad og P305 milyon ug kini gilangkuban sa 288,000 kaso sa sako nga tag-25 kilos ang unod. ( Richel Gubalani)
