Duha ka resolution ang ginpasar sang Sangguniang Panglungsod sang Bacolod nagaduso sa suspensyon sa pagpatuman kag operasyon sang Private Motor Vehicle Inspection System ( PMVIS) sa ciudad.
Ini nga resolusyon ang ginsumiter nanday Councilor Wilson “Jun” Gamboa. Jr. kag Dindo Ramos.
Sa iya nga bahin, ginpahayag ni Councilor Gamboa, ang kinalain lang sang resolusyon nga iya ginpresentar amo, ini ang naka-address sa talatapan ni Presidente Rodrigo Duterte samtang ang kay Councilor Ramos ang naka-direkta sa regional office sang Land Transportation Office (LTO) sa Western Visayas.
Suno kay Gamboa kun nga-a ginahingyo niya ang pagsuspendir sang operasyon sang PMVI-Center bangud sa reklamo sang mga pumuluyo kag bangud man nga sa madumduman ginmando sang Presidente ang pagsuspendir sini bilang rekisitos para sa rehistrasyon kag renewal sang mga salakyan.
Gina-kwestyon ni Gamboa ang implementasyon sang nasambit nga tikang diri sa ciudad sang Bacolod apesar may una na nga suspension order ginpapana-og ang pangulo sang Pilipinas.
