Gihangyo karon ni Davao City Mayor Sara Duterte-Carpio ang Dabawenyos nga dili panumbalingon ang kisaw sa pulitika aron dili mawala sa pokus ilabi na sa pagsunod sa minimum public health standards.
Kini taliwala matud pa sa nagkadool na nga filing sa filing of candidacy ug ang pagsugod sa kasikas sa politikanhong hisgutanan.
Giawhag sa alkalde ang tanan nga kinahanglan huna-hunaon kanunay nga nipasulabi pa ang community quarantine status ayha maglusad og mga aktibidad nga posible pa unya nga makasupak sa mga guidelines ubos sa IATF, DOLE, ug DTI bisan sa mga Executive Orders sa lokal nga panggamhanan.
Boot ipasabot ni Mayor Inday nga likayan una ang paglusad og mga dagkong aktibidad may kalabutan sa politika aron dili mahimong rason sa pagsamot sa transmission sa virus.
Kahibaluang sunod-sunod nga caravan ang gilusad ning milabayng mga adlaw aron awhagon ang Mayor nga modagan sa pagka-pangulo sa 2022 election kung asa pinakaulahi niini mao ang caravan sa Ituloy ang Pagbabago Movement kon IPM nga nanukad sa Davao Occidental ug natapos didto sa Nabunturan sa Davao de Oro. BNFM-DAVAO
