Padayon nga ginabulong sa Bailan District Hospital ang 38-anyos nga babayi matapos nag-angkon sang pilas sa natuo nga abaga tuga sang pagpangluthang sa Sitio Uyapad, Brgy. Binuntucan, Pontevedra, Capiz takna alas 9:07 sang gab-i, Sabado, Hulyo 27.
Sandig sa imbestigasyon sang Pontevedra Municipal Police Station, ginkilala ang biktima kay Christina Bigcas, single, wala sang trabaho kag residente sang nasambit nga lugar. Ginapahayag nga samtang nagainom-inom sang makahulubog nga ilimnon ang biktima kaupod sang iya duha ka mga himata sa sulod sang iya balay, hinali nalang ini nakabati sang lupok sang indi matumod nga armas-luthang.
Bangud sa natabo, naigo sang bala sa abaga ang biktima kag madasig nga gindala sa ospital. Sa karon, naga-conduct sang hot pursuit operation ang kapulisan agud matumod kag madakpan ang may kahimuan sang krimen. | Judy Ann Juare
