Nakabsan sa kinabuhi ang 18-anyos nga lalaki human gipusil sa makaduha ka higayon sa gawas sa balay niini sa Sitio San Pedro , Brgy. Tisa ning syudad sa Sugbo.
Ang biktima mao si Jomar Martin, residente sa naasoyng lugar ug nakaangkon kini og mga samad pinusilan sa tiyan ug liog.
Sa imbestigasyon sa kapulisan, nasayran nga sa wala pa mahitabo ang pagpamusil , nakit-an ang biktima nga nagsuroysuroy sa maong dapit ug nangutana sa iyang mga silingan kon nakakita ba sila og duha ka tawo nga nangita kaniya.
Ug pipila ka minuto ang milabay, aduna nay buto-buto sa armas ug didto nakit-an ang biktima nga nagbuy-od sa lingkoranan gawas sa ilahang balay.
Gidala pa sa tambalanan ang biktima apan nakabsan na kini sa kinabuhi.
Nasayran nga ang 18-anyos nga biktima usa ka Street Level Individual (SLI) drug personality sa ilahang dapit.
Tungod niini, mao kini ang gitan-aw nga motibo sa kapulisan nga hinungdan sa pagpamusil.
