KORONADAL CITY – NAGPAPATUPAD ngayon ng “load shedding” o scheduled brownout ang South Cotabato Electric Cooperative o SOCOTECO 1 sa mga feeders na konektado sa Morales Substation.
Ayon kay Engr. Jefferson Gianzon, Operations Chief ng SOCOTECO 1 na ito ay dahil sa hindi na kaya ng 20 MVA na kapasidad ng Morales Substation ang tumataas na demand ng kuryente lalo na sa peak hours o mula ala-1:00 hanggang alas-3:00 ng hapon.
Nakadagdag aniya sa overloading capacity ang mainit na panahon dala ng El Niño dahil dumami ang sabay-sabay na gumagamit ng aircon at electric fan. Apektado ng load shedding ang Feeder 31, 32, 33, 34 at 35.
Inihayag ni Gianzon na kada araw, isa sa naturang mga feeders ang makakaranas ng dalawang oras na brownout. Ang load shedding ay magtatagal ng dalawang linggo.
