LEGAZPI CITY – Enot nang sinabi kan manihamiento kan Legazpi City Grand Terminal na piglalaoman ninda an dakol na numero kan mga pasaherong maruso pagkatapos kan Enero 1 orog na sa pagbaralikan kan klase asin trabaho.
Kan Enero 2, uminabot sa haros 20,000 na mga pasahero an nairehistro puon alas 4 nin maagahon hasta alas 5 nin pagkahapon.
An mga ini, pabalik sa National Capital Region.
Pareho man na senaryo an naobserbaran kasuhapon huli ta baralikan na sa klase asin trabaho.
Nganing mamanehar asin maakomodar an mga commuter, nag-isyu man an Land Transportation Franchising and Regulatory Board nin special permits sa nagkapirang mga bus.
Apwera kaini, nag-deploy man an terminal ki dugang na mga byahe, mantang an PNP nagpautob man ki maigot na security check.
