Madamo sang mga barangay sa banwa sang Jamindan ang naka-eksperyensya sang tuman ka taas nga lebel sang tubig nga wala nila na-ekperyensyahan sang una.
Ini ang nangin pahayag ni Jamindan Mayor Mac Arthur Valdemar sang mainterview sang Brigada News FM.
Suno sa alkalde, 10 tanan ka mga barangay sa banwa ang naglubog sa tubig baha kapareho sang Poblacion, Esperanza, Lapaz, Bario Fe, Agcagay, Pangabuan, Agambulong, Masgaraw, Aglibacao kag ilabi na ang Barangay Jagnaya kun sa diin 100% sang mga panimalay ang apektado.
Dugang pa ni Valdemar, may mga pamilya nga nagbakwit sa mga evacuations centers kaangay nalang sang 90 ka pumuluyo nga nag i-evacuate sa Brgy. Poblacion nga isa man sa naapektuhan sang pagbaha.
Samtang, amat-amat naman nga nagabalik ang linya sang kuryente sa mga kabarangayan matapos nga nagnubo na ang lebel sang tubig.
Nagpasalamat ang alkalde sa mga katapo sang MDRRMO, MHO, MSWDO, PNP, BFP kag 3ID sang Phil. Army kag subong man sa mga pribado nga grupo kaangay sang Guardians nga nagresponde sa nagluntad nga pagbaha.
Nagpasalamat man si Valdemar sa Provincial Government ilabi na kay Capiz Governor Fredenil Castro sa personal nga pagdul-ong sang 300 tanan ka mga foodpacks para sa mga apektado. | KMD Gicalde
