BALAYAN – Arestado ang dalawang kalalakihan habang nakatakas naman ang isang barangay kagawad sa ikinasang police operation kontra iligal na sabong o tupada sa Brgy. Munting Tubig sa Balayan, Batangas.
Kinilala ng Balayan Municipal Police Station ang mga naaresto na sina Juan Alicante, 71 anyos, residente ng naturang barangay at Luis Velasco, 45 anyos, residente ng Brgy. Caloocan ng naturang bayan.
Nakatakas naman ang barangay kagawad na si Victorino Butiong y Pagcaliwangan na residente rin ng naturang barangay.
Narekober mula sa mga ito ang tatlong manok na panabong, dalawang tari at perang nagkakahalaga ng 1,480 pesos.
Nakakulong na ang dalawa sa custodial facility ng naturang himpilan habang pinaghahanap na ang nakatakas na barangay kagawad.
Nahaharap ang mga ito sa kasong paglabag sa PD 449 o ang Anti-illegal Cockfighting Law. | Mike Salgado
