MAY pahimangno karon ang kapulisan sa mga kabataan ingon man sa mga ginikanan kalabot sa paggamit sa social media ug pag-send og mga litrato.
Kini human sa insidente nga usa ka maestro ang gidakop tungod sa pagbahad sa usa ka 17-anyos nga estudyanteng babaye nga ipakaylap online ang hubo nga litrato sa maong menor de edad.
Segun kang Police Cpl Aljun Cunanan, investigator sa anti cyber crime unit 12 nga kasong RA 9995 kun Anti Photo and Video Voyeurism ug Grave Threat in relation to Section 6 sa RA 10175 ang giatubang sa usa ka
Sherwin Paraiso, 25- anyos, ulitawo, usa ka public school teacher nagpuyo sa Purok Malok, Brgy. Labangal, GenSan.
Matud ni Cunanan nga maayo kay paspas nakapangayo og tabang ang maong batan-on kanila hinungdan nakahimo sila og entrapment operation ug nadakpan ang suspek.
Tambag ni Cunanan sa mga batan-on dili na lang magpapiktyur og hubo ug dili magpasa niini ngadto sa bisan suod nga higala tungod moabot ang panahon nga basin kini ang gamiton batok kanila.
Alang sa mga ginikanan, giawhag ni Cunanan nga angayang bantayan ang ilang mga anak, i-check ang ilang social media accounts ug kung may i-post angayang mangayo og pagtugot kanila.
