PASPAS nga imbestigasyon sa kamatay’ng nahitabo ang mandu sa labaw sa kapulisan sa GenSan sa iyang mga sakop atol sa pagpatawag og emergency conference niini.
Matud ni PCol. Gilberto Tuzon, director sa GenSan City Police Office kun GSCPO, tumong niini nga mahatagan og hustisya ang pamilya’ng nawad-an og kinabuhi tungod sa pagpamusil.
Lakip usab sa iyang mando ang pagpakusog sa ‘intelligence’ monitoring batok motorcycle riding in tandem criminals. Apil ang paglig-on sa ilang visibility ug mobile patrol sa nagkadaiyang bahin sa dakbayan.
Kahibaloan nga karong bulana lang misaka na sa upat katao ang gipusil-patay sa GenSan. Samtang gikan Enero hangtud karong bulana misaka na sa 23 ka tao ang gipusil-patay asa ang labing ulahi mao ang usa ka Michael Pagaduan nga kanhi piniriso nga bag-ong gawas atong Mayo 03 sa City Jail.
