MOKABAT sa kapin kulang 900,000 estudyante sa elementarya hangtud na senior high school ang gilaomang mobalik sa klase karong adlawa, Agosto 29.
Ang ihap ang gikan sa 1.2 milyon mga magtutungha nga nag- enrol nakalabay’ng school year, butyag ni Carlito Rocafort, regional director sa Department of Education (DepEd) 12. Matud ni Rocafort, andam na ang ahensiya sa pagsugod sa school year 2023-2024 luyo sa kakulangon sa magtutudlo ug classroom sa nagkadaiyang bahin sa rehiyon.
Sa datus sa DepEd, naa sa 44,000 ka mga magtutudlo lakip ang non-teachers ang naa sa ilang buhatan. Apan giangkon nga kulang kini tandi sa ihap sa mga magtutungha nga gilaomang mosulod sa mga tulunghaan. Gawas niini, duna usab kakulangon sa classroom asa dunay mga eskwelahan nga nagpatuman og shifting sa klase.
Luyo niini, pipila ka lgu’s ang mitabang sa pagtubag sa problema, sama sa pagpatukod og temporary learning center’s. Sa karon, dunay mga hiring sa magtutudlo aron matubag ang kakulangon sa ihap sa mga teachers sa rehiyon. I Richel Gubalani
