Gipasakaan na sa kapulisan ug kasong homicide ug kalapasan sa Republic Act 11053 kun Anti-Hazing Law ang pito ka mga miyembro sa Tau Gamma Phi fraternity.
Ang pito ka tao mao ang giingong nalambigit sa hazing sa usa ka tinun-an sa University of Cebu-Maritime Education and Training Center (METC) niadtong Disyembre sa miaging tuig nga si Ronnel Baguio nga niresulta sa kamatayon niini.
Kauban sa kapulisan sa pagpasaka ug kaso ang mismong inahan sa biktima ug ang mga opisyal sa Volunteers Against Crime and Corruption (VACC) nga gigiyahan sa Public Attorney’s Office Central Visayas (PAO 7).
Ang mga gikiha mao sila si Philip Angelo Salapang, Grand Triskelion; Mark Einan Hernandez, Master Initiator; John Thirdy Anog, resident member; Lei Ruben Siao, Deputy Grand Triskelion ;Kevin Muñoz, Deputy Grand Triskelion; Rogelson Gesalago Getaruelas, recruiter ug giingong magtutudlo sa biktima; ug si Aldrake Suan, ang tag-iya sa panimaly diin nahitabo ang hazing.
Matod ni Police Lieutenant Colonel Maria Theresa Macatangay, hepe sa Investigation and Detective Management Unit sa Cebu City Police Office nga human nila napasaka ang kaso sa Cebu City Prosecutors Office, magpaabot na lang sila nga mapasaka kini sa korte aron malutsan og warrant of arrest ang mga suspek.//
