Pilas sa sag-ang ang naangkon sang isa ka 64-anyos nga lalaki matapos ginlabo sang iya man himata sa Brgy. Cabugao, Roxas City pasado alas 4:00 kahapon sang Lunes, Setyembre 4.
Ginkilala ang biktima kay Selvino Dela Cruz samtang ang suspek amo si Wenefredo Dela Cruz, 65-anyos lunsay mga residente sang nasambit nga lugar.
Sandig sa imbestigasyon sang Roxas City PNP, samtang nagainom-inom sang makahulubog nga ilimnon sanday Selvino kag Wenefredo, nagpatunga ang indi pag-intindihanay sa duwa rason nga hinali lang ginlabo sang suspek ang biktima kag naigo sa sag-ang.
Madasig nga ginpadangat sa Roxas Memorial Provincial Hospital ang biktima para sa nagakaigo nga pagbulong.
Natigayon naman nga nadakpan ang suspek sang mga nagresponde nga kapulisan kag sa karon nagapabilin ini sa kustodiya sang Roxas City PNP para sa nagakaigo nga disposisyon. | Judy Ann Juare
