Patay ang 6 ka mga gituohang miyembro sa New People’s Army sa managlahing engkwentro tali sa militar sa Malaybalay City, Bukidnon ug Butuan City.
Una niini, usa ka focused military operation ang gipahigayon sa militar batok sa mga naglihok nga rebelde ubos sa North Central Mindanao Regional Committee kung asa nadiskubre ang hideout sa mga rebelde sa Sitio Cogon, Brgy. Manalog, Malaybalay City, Bukidnon.
Sa maong operasyon, kapig 15 ka rebelde ang naka-engkwentro sa militar, diin miresulta kini sa pagkamatay sa 5 ka NPA.
Samtang, laing engkwentro ang nahitabo sa Brgy. Bugsukan, Butuan City, Agusan del Norte nga miresulta sa pagkamatay sa usa ka rebelde nga gi-ilang si alyas Jimboy nga miyembro sa Sandatahang Yunin Pampropaganda 21A, Guerilla Front 21, Sub-Regional Committee Westland sa North Eastern Mindanao Regional Committee.
Sa duha ka panagsangka, narekober ang 14 ka mga tag-as nga armas ug 1 ka low powered firearms.
Subay niini, nagpasidaan si 4th Infantry Division Philippine Army Commander Major General Romeo Brawner Jr., nga magpadayon ang opensiba sa militar kaabag ang Philippine National Police batok sa NPA aron hingpit nang matapos ang insurhensya.
