SORSOGON CITY—Umakyat na sa 13 ang aktibong kaso ng Covid-19 sa lalawigan ng Sorsogon matapos na makapagtala ng tatlong bagong kaso kahapon.
Batay sa ipinalabas na datos ng Sorsogon Provincial Health Office, ang mga nagpositibo ay isang 25-anyos na babae at 26-anyos na lalaki, kapwa mula sa Barangay Balete, Bacon District at parehong close contact.
Kabilang rin sa mga bagong tinamaan ng sakit ang isang 6 na buwang gulang na babaeng sanggol mula naman sa Barangay Panganiban sa bayan ng Gubat.
Sa kabuuan, mayroon nang 8,381 na mga tinamaan ng Covid-19 sa lalawigan habang nananatili naman sa 475 ang mga namatay dahil sa nasabing sakit habang umabot na sa 7,893 ang total recoveries matapos na makarekober ang 35-anyos na babae mula sa Barangay Punong sa bayan ng Casiguran.
Kaugnay nito, patuloy pa rin ang paghihikayat ng mga health official sa publiko na magpabakuna at sundin pa rin ang mga pag-iingat laban sa posibleng pagkahawa sa nasabing sakit.###
