SORSOGON CITY—Sa layuning mapataas ang bilang ng mga bakunado kontra Covid-19 sa lalawigan ng Sorsogon ay naglaan ang lokal na pamahalaan ng lalawigan ng insentibong bigas sa mga magpapabakunang mamamayan.
Bawat indibidwal na magpapabakuna ay makatatanggap ng limang kilong bigas, hakbang upang mahikayat na maging fully vaccinated at maging boosted ang bawat pamilyang Sorsoganon.
Sa impormasyon mula sa Provincial Information Office, nasa 2,000 sako ng bigas ang inilaan ng provincial LGU na ipapamahagi sa 14 na munisipyo at tatlong district health unit sa lungsod ng Sorsogon.
520 nito ay para sa LGU Barcelona 2,600 sa Bulan; 290 sa Bulusan; 790 sa Casiguran; 1,540 sa Castilla; 1,610 sa Donsol; 1,590 sa Gubat; 1,460 sa Irosin; 830 sa Juban; 920 ang Magallanes; 1,060 Matnog; 1,930 sa Pilar; 580 sa Pto.Diaz; 400 sa Sta.Magdalena at 3,880 sa Sorsogon City.
Ang proration ay base sa pinag-samang numero ng mga indibidwal na hindi pa bakunado at natitirang hindi pa nagpa-booster.
Sa ngayon ay limitado lamang ang pamamahagi nito sa mga magpapabakuna kung saan kapag naubos na ang suplay ay tapos na rin ang nasabing programa.
Samantala, mula naman sa pitong piso per vaccinee na natatanggap ng vaccination team sa MR-SIA noon ay gagawin na itong sampong piso sa bawat indibidwal na kanilang mababakunahan.
Mababatid na kapos pa rin sa 80% ng target population ang nababakunahan laban sa Covid-19 sa lalawigan ng Sorsogon.###
