Gikan sa Cebu ang upat sa 53 ka mga namatay sa pagkahagsa sa military aircraft sa Sulu niadtong Dominggo.
Sila si Staff Sergeant Michael Bulalaque ug Staff Sergeant Jan Neil Macapaz lumad nga taga Lapu-Lapu City ug nasayran nga si Bulalaque gikan sa Barangay Bankal samtang si Macapaz gikan sa Barangay Pusok.
Ang laing duha nga sila si Technical Sergeant Donald Badoy ug Airman first Class Fortunate Regidor na-assign usab sa Benito Ebuen Airbase sa Lapu-Lapu City.
Giingong nag upat, misakay sa C-130 Hercules transport plane sa Laguindingan Airport sa Misamis Oriental ug mobalik na unta sila sa Cebu, apan, giingong unang gi-drop ang ubang sakop sa tropa sa Sulu diin kini nahagsa.
Subay niini, sila si Lapu-lapu City Mayor Junard Chan ug Lapu-Lapu City Rep. Paz Radaza, mipaabot sa ilang pahasubo ngadto sa mga pamilya sa biktima.
