Nasakmit sa mga sakop sa Lapu-lapu City Intelligence Unit pinangulohan ni Police Major Joey Bicoy ang minilyon nga balor sa drugas nga mitimbang sa kapin upat ka kilo atol sa ilang gipahigayon nga buybust operation sa barangay Babag bukirang bahin sa dakbayan sa Sugbo.
Nadakpan usab ang usa ka mahuyang nga si Roldan Canillo Rosales alyas Shakira 26 anyos taga Sitio Sip-ak Sudlon 1 Cebu City
Si Rosales, miangkun nga mao ang nagdeliver sa maong mga butang bugti ang P5,000 nga suhol.
Gibanabana nga mobalor ngadto sa dul-an P28 million ang maong mga drugas nga nasakmit.
Gibutyag ni Police Col. Arnel Banzon director sa Lapu-lapu City Police Office nga giila nga usa ka High value target sa pagpayuhot og drugas ang maong dinakpan gumikan sa gidaghanun sa mga shabu nga nasakmit sa operatiba gikan niini.
Gitug-an usab ni Banzon nga base sa ilang pagmonitor, posible nga gikan sa Abuyog Leyte ang contact sa maong durugista.
Samtang si Lapulapu City Mayor Junard Ahong Chan mapasigarbuhon sa iyang kapolisan ug nakadayeg sa maong lain na usab nga kalampusan diin ikatulo na kini nga dakong operasyon sa kapolisan sa Lapulapu sulod niining tuiga.
Posible sab unya nga mohatag og incentives ang mayor sa iyang kapolisan gumikan sa maong kalampusan.Nasayran nga ang pagkasikop sa maong suspetsado nga si Rosales subay sa gihimong operasyon sa LCPO niadtong Abril niining tuiga nga miresulta usab sa pagkasikop sa usa ka Jeffrey delos Santos diin na link ang pangalan ni Rosales.
